Klei hdĭp ƀuôn sang Orangdaya đĭ kyar hĭn jai, kyua ala čar diñu jing anôk lăn mda ea mơak mâo lu mnơ̆ng yuôm, msĕ si mâo boh-tâo yuôm, mah lehanăn lu mnơ̆ng yuôm mkăn đa đa. Hang ksĭ jing anôk lu ala čar riêng gah jưh lehanăn čhĭ mnia. Kyua klei đi kyar anăn yơh, phung mtao lehanăn khua mua Khêč mâo klei čiăng plah hmiă, mă mnơ̆ng-thơ̆ng yuôm hlăm čư̆, hlăm ea. Thŭn 111 êlâo-Yang Krist (BC), ala čar Khêč hriê plah mă lăn ti Dưr leh anăn mkŏ mjing 9 ikata (đơn vị) kiă kriê hnơ̆ng kring, hlăm anăn mâo kring Yao Chi (Jiao Zhi) phă Dưr gue ala čar Khêč, kring Jiu Chan ti Dưr Krah lehanăn kring Rinan ti Krah. Grăp boh kring mbha lu kwar. Kring Rinan mâo kwar Si Juan, Bi Jing, Chu Wu, Lu Rong, Siang Lin. Tui si hdrôm hră Kian Han Shu lehanăn Hau Han Shu, ênoh gŏ sang lehanăn ênoh mnuih ƀuôn sang ti kring Rinan hlăm thŭn tal 2 êdei-Yang Krist (AD), mâo 15.460 gŏ sang lehanăn mâo 69.485 ačô mnuih ƀuôn sang. Truh thŭn 140, mâo 18.263 boh gŏ sang lehanăn mâo 100.678 ačô mnuih ƀuôn sang. Ala Čar Khêč mkŏ mjing masin (bộ máy) kiă kriê samei (xã hội) mâo knơ̆ng, mơ̆ng knơ̆ng bruă khua kwar truh kơ hnơ̆ng alŭ ƀuôn. Ti gŭ hnơ̆ng kwar jing phung mnuih ƀuôn sang pô ruah mdơ̆ng ngă khua kurung tui si klei bhiăn.
Klei mđăo mgô dhar kreh, boh nik nak hĭn jing klei ktư̆ juă ƀuôn sang lehanăn bi rai lăn ea čiăng mă mnơ̆ng-thơ̆ng yuôm, kyuanăn mnuih phŭn pô lăn Orangdaya mâo klei krŭ kdơ̆ng wĭt hŏng knŭk kna karkah Khêč. Ti krah knhal gưl ênuk tal 2 mnuih pô lăn Orangdaya ti Dưr kring Rinan, lu blư̆ kgŭ kdơ̆ng wĭt hŏng phung khua kwar Ala Čar Khêč kyua klei êngiê, ƀiădah arăng lŏ kpĭ kpiêt, lŏ ngă jhat hĭn jai. Snăn klei hdĭp ƀuôn sang bŏ hŏng klei dleh knap hĭn.